Calendario banco de libros xuño 2021

Estimadas familias:

Xa se achega o final do curso e toca, como cada ano, informarvos sobre o calendario do servizo de banco de libros que xestiona a ANPA. Cómpre ser consecuentes coa situación que estamos a vivir e por iso decidimos programar a devolución de libros de xeito escalonado. 

A devolución dos libros usados este curso farase ao longo da vindeira semana coincidindo parcialmente coas datas establecidas polo IES para tentar que fagades os mínimos desprazamentos posibles e evitar aglomeracións.

En canto á entrega dos materiais para o ano que vén, desta vez esperariamos a comezos de setembro. En calquera caso, a nosa idea é, sempre que a situación o permita, preparar os lotes ao longo do mes de xullo e informar ás familias, vía correo electrónico dos libros que lles corresponden.

Xoves 24 de xuño de 2021

Alumnado de 3º e de 4º da ESO: o centro xa asignou a este alumnado unhas quendas para devolver os libros emprestados polo banco de libros da Xunta desde as 16:30 ás 19:15. Aproveitaremos as mesmas quendas para que poidades devolver os libros da ANPA do curso que acaba de rematar. Así que, ou ben as familias, ou ben o alumnado, poden pasar polas aulas que indiquemos para devolver o material da ANPA. Se vos resulta imposible acercarvos a devolver os libros á hora que vos corresponde podedes vir a outra, pero é importante que na medida do posible tratemos de respectar as quendas para que non se acumule máis xente da recomendada.

Alumnado de 3º da ESO:

• 16.30: 3º ESO A
• 17.00: 3º ESO B
• 17.30: 3º ESO C
• 18.00: 3º ESO D
• 18.30: 3º ESO E
• 19.00: 3º ESO F

Alumnado de 4º da ESO:

• 16.45: 4º ESO A
• 17.15: 4º ESO B
• 17.45: 4º ESO C
• 18.15: 4º ESO D
• 18.45: 4º ESO E
• 19.15: 4º ESO F

Venres 25 de xuño:

Alumnado de 1º e 2º da ESO e 1º e 2º de BAC: Establecemos as seguintes quendas:

Alumnado de 1º da ESO:

• 16.30: 1º ESO A
• 17.00: 1º ESO B
• 17.30: 1º ESO C
• 18.00: 1º ESO D
• 18.30: 1º ESO E
• 19.00: 1º ESO F

Alumnado de 2º da ESO:

• 16.45: 2º ESO A
• 17.15: 2º ESO B
• 17.45: 2º ESO C
• 18.15: 2º ESO D
• 18.45: 2º ESO E
• 19.15: 2º ESO F

Alumnado de 1º BAC:

• 16.30: 1º BAC A
• 17.10: 1º BAC B
• 17.50: 1º BAC C
• 18.30: 1º BAC D

Alumnado de 2º BAC:

• 16.45: 2º BAC A
• 17.25: 2º BAC B
• 18.05: 2º BAC C
• 18.45: 2º BAC D

SOLICITUDE DE LIBROS PARA O CURSO 2021-22:

Antes de fin de mes enviarémosvos por correo o formulario de petición de libros para o curso 2021-22. Teredes de prazo para solicitalos ata o 11 de xullo. A entrega farémola no mes de setembro, con todo, trataremos de avisarvos en xullo dos libros que se vos asignaron para que poidades conseguir o resto pola vosa conta. Aclaracións:

• O próximo curso non cambian os libros polo que serven os que se están usando agora.
• Como sabedes, repartiremos os libros que teñamos entre as solicitudes recibidas: cantos máis libros teñamos, máis podemos repartir para o próximo curso. Hai cursos nos que vai haber máis fondos que noutros.
• Pode devolver e recoller os libros outra persoa no voso nome se vós non podedes.
• As familias con fillos no instituto que non se asociaran ata agora non van recibir libros, xa que aínda que non se poidan repartir ata setembro, os lotes organizarémolos antes.
• Tede paciencia: son moitos libros, é un traballo lioso e queremos facelo ben
• Respectemos o distanciamento e as quendas para evitar aglomeracións.

¿Que vai pasar coa ANPA?

¿VAI PODER SEGUIR FUNCIONANDO?

Este luns 10 de maio de 2021 vai celebrarse a asemblea xeral anual. Un dos puntos a tratar é a renovación da xunta directiva e por iso é preciso a presenza de todas as familias que conforman a comunidade educativa do IES de Cacheiras.

O curso está a piques de rematar e en breve haberá que poñer en marcha o Banco de libros. Consideramos que é un servizo fundamental, do que se benefician moitas familias, pero vai ser dificil mantelo se non contamos con máis axuda.

É urxente facer a renovación da xunta directiva e que entren novos socios e socias para poder asegurar a continuidade da ANPA. Polo tanto, agardamos a vosa presenza este luns no salón de actos do IES de Cacheiras para falar do futuro da asociación.

A asemblea será ás 19.00h. en primeira convocatoria e ás 19.30h. en segunda, prevéndose a constitución da asemblea na segunda convocatoria.

Cine e memoria

Hoxe o alumnado de 2º da ESO asistiu á proxección do documental “As Encrobas, a ceo aberto”, de Xosé Bocixa, que ademais, lles mandou un agarimoso saúdo grabado en vídeo.

A actividade forma parte do proxecto “Cine e memoria” que a anpa está a desenvolver este curso en colaboración coa Deputación da Coruña.

Ademais desta longametraxe documental, o alumnado vai ver tamén “El silencio de otros”, “A batalla descoñecida” e “A muller do eternauta”.

Os catro documentais elixidos polos departamentos de Igualdade e de Historia tratan temas relacionados coa memoria histórica.

Confiamos en que gocen aprendendo.

Esta actividade está subvencionada pola Deputación da Coruña

Convocatoria asemblea Xeral 10/5/21

Estimadas familias: 

Por indicación do presidente convocámolos a unha Asemblea Xeral Ordinaria de socios e socias, que se ha celebrar o vindeiro luns 10 de maio no salón de actos do IES de Cacheiras ás 19:00 h en primeira convocatoria e ás 19:30 h en segunda, prevéndose a constitución da asemblea na segunda convocatoria, coa seguinte

ORDE DO DÍA:

1. Lectura e aprobación, se procede, da acta da sesión anterior.
2. Informes da presidencia e memoria actividades ano 2020. 
3. Estado e aprobación, se procede, de contas.
4. Orzamento, programación xeral e establecemento da cota de asociación do presente exercicio.
5. Elección e renovación de cargos da Xunta Directiva.
6. Peticións e preguntas.

Desde a súa constitución no ano 2003, a anpa “San Simón” do IES de Cacheiras ten traballado arreo en prol de toda a comunidade educativa, conseguindo logros tan importantes como a gratuidade do transporte escolar para o alumnado de Bacharelato, a ampliación da biblioteca do centro, o servizo de custodia os martes ao mediodía ou a posta en marcha do Banco de libros. Ademais, grazas ás subvencións da Deputación e do concello de Teo, a asociación colabora activamente cos diferentes departamentos do centro para establecer un programa de actividades que complemente a formación na aula. 

Rogamos a presencia de tódolos socios e socias, xa que é preciso unha renovación urxente da xunta directiva. Varios dos membros actuais causaron ou van causar baixa de xeito inmediato, así que hai que constituír unha nova xunta directiva e para iso é necesario que entren voluntari@s para ocupar os cargos vacantes (presidente, vicepresidente e secretaría). 

Se non queremos perder estes servizos, nin deixar de ter unha canle de comunicación directa co equipo directivo do centro cómpre atopar socios e socias que tomen o relevo. A continuidade da anpa depende de vós, das familias, xa que se non conseguimos formar unha nova xunta directiva en breve esta ANPA vai desaparecer.

Agardamos que vos animades e que entredes a formar parte da xunta directiva da asociación, para poder seguir traballando e poñendo en marcha novos proxectos.  

Saúdos,

A Xunta directiva.

Grazas

Estimadas familias.

Queremos agradecervos o esforzo que fixestes ao colaborar na recollida de cartóns de leite para o Banco Veciñal de Alimentos de Teo. A nós parécenos todo un éxito que ao longo destes cinco días se xuntaran 571 litros de leite para repartir entre as familias do concello que o precisan.  

Asimesmo, parécenos importante que se implicara toda a comunidade educativa e aproveitamos para incidir en que, con iniciativas solidarias coma esta, non só estamos a axudar aos nosos veciños, senón que tamén contribuímos a formar en valores como o compromiso e a solidariedade aos nosos fillos e fillas. 

Cabe lembrar ademais que, aínda que a nosa foi unha colaboración puntual co Banco Veciñal de Alimentos, este é un servizo permanente que presta axuda ás familias do concello ao longo de todo o ano e que se queredes seguir prestando a vosa axuda, teñen un punto de recollida estable no supermercado Pernas de Pontevea. 

Moitísimas grazas pola vosa colaboración.  

Así vai a colaboración co Banco de Alimentos

A campaña de colaboración co Banco Veciñal de Alimentos de Teo que estamos realizando no IES recolleu nos dous primeiros días 147 litros de leite. Cun pequeno xesto podemos axudar a familias do noso concello. Grazas pola participación e recordade que o contedor seguirá dispoñible para deixar leite nel ata este venres 26.

Colaboración co banco de alimentos

Informámosvos de que na semana do 22 ao 26 de febreiro haberá un contedor no centro para depositar cartóns de leite para o Banco Veciñal de Alimentos de Teo. 

Parécenos importante que tanto o alumnado, como o profesorado e as familias nos involucremos e colaboremos neste iniciativa solidaria. Se conseguimos que cada rapaz/a  deixe polo menos un cartón de leite recadaríanse 700 litros, cos que contribuiriamos a paliar a falta de existencias que ten o servizo. Cómpre lembrar que a COVID-19 está a provocar unha crise social e económica sen precedentes e cada vez son máis as familias que teñen que recorrer ao Banco Veciñal de Alimentos de Teo. 

Animádevos e participemos tod@s, cun pequeno xesto podemos axudar a moita xente. 

Saúdos da Xunta directiva

Memoria 2020

Estimadas familias 

Por mor das medidas de distanciamento social impostas pola Xunta de Galicia para tratar de frear a propagación da COVID-19 aínda non puidemos convocar a asamblea xeral de socios do ano 2020. Non dispoñemos do soporte tecnolóxico necesario para facer unha convocatoria online con garantías suficicientes, polo que estamos á espera de que a situación nos permita facer unha convocatoria presencial. 

Namentras isto non é posible, queremos facervos chegar a memoria anual de actividades e un resumo dos gastos e ingresos da ANPA San Simón do IES de Cacheiras durante o ano 2020. 

Tal e como se explica na memoria, non puido completarse a programación proposta, xa que moitas das actividades tiveron que cancelarse. As medidas de hixiene e distanciamento social fan moi difícil a realización de talleres de xeito presencial, pero aínda así trataremos de que se recuperen algúns para este curso ou se traten de facer de xeito telemático, coa finalidade de restablecer unha certa normalidade entre o alumnado. 

Do mesmo xeito, aproveitamos para comentarvos a necesidade de renovación da xunta directiva actual, pendente tamén da convocatoria dunha asamblea xeral. Catro integrantes da directiva xa non están desempeñando as súas funcións, polo que se precisa que entren reforzos de xeito inmediato. 

Os membros que estamos seguimos mantendo reunións periódicas de xeito telemático, pero vémonos incapacitados para seguir sacando adiante o traballo sós e por iso é preciso que entren voluntarios novos, para que o labor da ANPA non se paralice. Só tedes que enviar un correo á conta da ANPA (anpaiescacheiras@gmail.com)  cos vosos datos e poñerémonos en contacto de inmediato. 

Para colaborar coa directiva non é preciso dispor de moito tempo. Se o tedes, estupendo, porque poderedes aportar moito e asumir algunha tarefa específica, pero aínda que só dispoñades dun anaquiño de vez en cando, ese pouco tempo e a vosa axuda serán igualmente valiosas. Lembrade que todo suma. 

Saúdos da xunta directiva.

memoria-anual-curso-2019-2020-3Descargar

Dúas aportacións para o IES

Onte deixamos no instituto unha caixa con 700 mascarillas que serán repartidas hoxe entre o alumnado. Permiten 25 lavados e inclúen dous filtros. Se queredes consultar as características técnicas, están aquí:

Ficha técnica mascarillas

Ademáis, hai unhas semanas quedou instalada unha nova mesa de pimpón que se suma ás outras dúas que xa mercara a ANPA para o centro en anos previos. O pimpón é unha das poucas actividades permitidas no patio nestes tempos –o futbolín tivo que ser retirado temporalmente para seguir o protocolo de distanciamento social.

Inicio do curso 2020-2021

Desde a Xunta directiva queremos darvos a benvida a un curso escolar especial e facer balance dos atrancos que tivemos que sortear para que todo o alumnado puidese empezar esta semana as clases.

Despois de que o curso pasado se vise interrompido pola pandemia da Covid-19 os nosos esforzos foron destinados cara acadar dous obxectivos básicos: un ensino seguro e presencial, rexeitando alternativas encamiñadas a reducir as distancias de seguridade e apostar pola solicitude de máis profesorado para o desdobre de grupos. 

Coidamos que no noso centro non hai alternativas viables ao ensino presencial que garantan a igualdade de oportunidades para todo o alumnado (por problemas de conexión, disponibilidade de equipos…) e así lle-lo fixemos saber ao equipo directivo. Tamén revisamos o protocolo de adaptación á nova normalidade educativa elaborado polo centro, solicitando aclaracións e suxerindo modificacións que garantan o cumprimento de tódalas medidas de seguridade e que os nosos fillos e fillas poidan asistir ás clases con tranquilidade. Ao tempo, insistimos na necesidade de que se establezan o máis axiña posible as dinámicas de traballo necesarias para manter unha ensinanza on-line. Debemos estar preparados para que se algún grupo/s non pode asistir presencialmente poida seguir as clases con normalidade desde a casa. 

Nos últimos días tamén tivemos que lidiar co problema de saturación das liñas de transporte escolar. Foi difícil, pero grazas ao esforzo conxunto co concello e a dirección do centro conseguiuse que teña praza todo o alumnado que solicitou o servizo. 

Con todo, hai que ser conscientes de que este vai ser un curso difícil e que imos ter que enfrontarnos aos atrancos que poidan xurdir pola posibilidade de contaxios. Aínda que os protocolos son exhaustivos e están deseñados para minimizar o risco, é responsabilidade nosa, como pais, velar polo cumprimento de tódalas medidas para evitar o espallamento da pandemia entre o alumnado do centro. Debemos concienciar aos nosos fillos e fillas da importancia de extremar as precaucións. E ter presente que as primeiras medidas de seguridade tómanse na casa, levando un control sanitario rigoroso e evitando que unha alumna ou alumno enfermo vaia ao centro. 

Neste punto, cómpre lembrar que no caso de que haxa que recurrir a un ensino telemático hai acordadas medidas para seguir avanzando nas materias e o compromiso por parte da dirección do centro de que o alumnado que teña que quedar na casa non vai quedar desatendido.      

Saúdos, xunta directiva